بالبلدي الفصيح "قال تأمين طبي قال"

دحين لك كم يوم محد عارف هادا الورم اللي في وجهك هوه من ألم في عيونك والا ألم في اسنانك صار وجهك مبرشم برشمه.. ايوه خودي راحتك ياستي في الكلام أصلا انتي ما تسيبيكي من النكد والخزاوه.. طيب ياسيدي ليه ما تروح للصحية عشان يشوفولك صرفه في الورم ده؟.. لا ياستي لا أبغى أروح ولا أبغى أجي خليني كده أحسن، لا يروح واحد من الدكاتره حقون التخدير يعطيني شرنقه (إبره) ويخليني انسدح جنبو طول عــــمــري، خــلـيـنــي كــده على الورم اللي عندي والله يخلي الفكس والقرنفـــــل.. طيب وبطــــاقــــة الـــتأمين اللي معـــاك ياسيدي حاططها في جيبك زينه؟.. ياســـتي بطـــــاقة التأمين الطــــبي زي قـــلـتـها، أعطونا هيه عـــشـــان يوجعوا قلوبنا ويفـــوروا دمنا، ما منها فايده كل ما تروح مستشفى من المــسـتـشـفـــيـــات يخرجوا عينك ويبهــدلوك آخر بهدله عشـــــان يعالجـــوك، أول شي ياخـــدو منك 30 ريال عن كل كشــــف ليه ما تدري؟ وما يعطــــوك العلاج اللي تبغـــاه إلا بعد ما تجي الموافـــقه من شركة التأمين على العلاج، كأنك قـــاعــــد بتشحت منهم، رغم انه الشــــركات والمؤسســــات اللي متعـــاقده معاهم بتدفع لهم الملاييين، يعني الواحد يروح على الشـــــرشـــــوره والمــــوافـــقـــه لــســـه ماجات، كأنه الموافقه على العلاج حتجي من الأمم المتحده اللي لا تهش ولا تنش، وجودها زي عدمها، كل ما تروح مستشـــفى معتمد بالــتـــأمــين الطبي تلاقـــي تعـــلـيـمــات تفـقـــع القــــلب، حتى سحب الـــعـصــب يبغـــالو موافـــقــه كــأنك رايح تسحب شاصيه، كل حاجــــه عــــندهم لازم موافــــقـــه؛ علاج الأسنان موافـــقـــه، علاج الإسهال، وعلاج العيون، وأي مرض تشـــتكي منه يبغالو موافقه على العلاج، هدا غير انه أمراض النســـاء والولاده لازم تكع فـــلـــوس على الأشــــعــــة والأدويه، تقـــولهم ليه كده؟ يردوا عــلــيك بفم مليان وعيون قـــويه: هادي الحاجات ما يغطيها الـــتــأمين، يعـــني بالعربي لا تجيب بزوره على حسابنا، هـــيا بالله ايـــش من تأمين طبي؟ هـــدا اسمه ضحك على الـــدقـــــون، ملاييــــين الــــريالات بيلطـــوشـــوهـــــا من الشـــركــــات والمـــؤسســـات على عـــقود التأمين الطـــبي اللي بيقــــولوا علــــيـــه، وكل اللي بيصـــرفـــوه من الأدويــه كــــم قــــــارورة دواء كحــــه وكم بكت حـــبـــوب مهــــدئه، لكن ما أقــــول الا الله يعــــين الحبايب على شـــركات التأمين الطبي اللي قاعــده تضحك على عــــباد الله، وأسأل الله انه لا يحوجنا لهم.. وعيشوا كــتـيـيـيـيـيـر تشــوفــــوا كــتـيـيـيـيـر.

خل المؤسه تعتمد لن اتامين وبعدين لكلحادث حديث